Ég er búin að skrifa langa færslu en blogger neitar að birta hana. Óþolandi helvíti.

Það er margt til í þessu.





What type of Fae are you?

Gleðilegt sumar!

Gleðilega páska!

Sándtrakkið er ekki tilbúið og verður líklega ekki birt fyrir páska enda er það ekki í forgangi akkúrat núna. (Hvað eru mörg ekki í því?)

Í dag er hefðbundin dagskrá, ritgerðarskrif, þvottur og létt þrif.
Á morgun er fyrsti áfangastaðurinn Selfoss City, þar þarf ég að kaupa fullt af páskaeggjum og sækja vegabréf. Þegar ég kem heim þarf ég að pakka eggjunum þannig að þau þoli flugferð og henda einhverjum tuskum oní tösku. Að þessu loknu munum við mæðginin aka til höfuðborgarinnar og leggjast til svefns á heimili foreldra minna.
Eftir tvo daga mun eiginmaðurinn taka á móti okkur á Heathrow.
Hvað gerist næstu daga þar á eftir verður að ráðast, það eina sem ég veit er að við eigum pantaða gistingu á sveitahóteli skammt frá Northampton og að við ætlum að borða páskaegg.
Að kvöldi þess 19. lendum við Leifur aftur á vorri fósturjörð og brunum heim í Þorpið.

Gott plan.

Skyldi ég koma haloscan inn í þessari tilraun?

Haloscan commenting and trackback have been added to this blog.

Grr.
Farin að sofa.

Ég var búin að fá nóg af gamla útlitinu. Sjáum til hversu lengi ég þoli þennan minimalisma.

Kíkið á færslu dagsins hjá þessari.

Ég er femínisti.

Sándtrakk lífs míns krefst yfirlegu en mun vonandi verða tilbúið innan viku.
Fylgist með...

Icelandair keypti upp allt auglýsingapláss moggans í dag og það er svo sem gott og blessað. Ég sé hins vegar enga ástæðu fyrir því að blaðið fjalli ítarlega um fyrirtækið í lesmálinu, mér finnst fúlt að borga þessa umfjöllun með mínum peningum.

Ég er svolítið blá núna.

Við sýndum síðustu sýninguna um helgina og auðvitað var það langskemmtilegasta sýningin. Leikhópurinn er alveg magnaður og mér finnst bara alveg þrælsorglegt að þurfa að yfirgefa þessa öðlinga í sumar.
Eiginmaðurinn kom heim um helgina og systkyni mín þyrptust í Þorpið til að fara með honum á sjóvið, held að þeim hafi ekki leiðst neitt rosalega. Hái, dökkhærði og myndarlegi maðurinn hvarf af landi brott í gær.
Mér gengur ekki alveg nógu vel að skrifa og ég er hrædd um að gamall draugur sé farinn að gera svolítið vart við sig. Ég kann samt að kveða niður svona drauga.

Ég er svöng.
hvort á ég að fá mér súkkulaði eða samloku í hádegismat?

Nú er búið að sýna söng- og gleðileikin fjórum sinnum og alltaf fyrir fullu húsi, það er býsna gott. Síðasta sýning í bili verður á laugardaginn og þeir koma að sjá hana eru ákaflega lánsamir þar sem bæjarstjóri Þorpsins, Ólafur Áki fjallagarpur, ætlar að elda eitthvað gott handa þeim fyrst og svo verður dúndrandi ball á eftir, semsagt svona Broadway stemmning.

Það er einhver Lukka farin að gera sig heimakomna í kommentakerfinu mínu og sú hegðar sér svolítið eins og ég eigi að þekkja hana, ég er ógeðslega forvitin. Er það kannski hin eina sanna Lukka hrukka? Ef ekki gefðu mér þá vísbendingu, plís!

Sjitt! Ég þori aldrei aftur að loka augunum af ótta við að sjá fyrir mér eða dreyma Geir Ólafs og "Halle Berry". Ég get svo svarið að ég var farin að halda fyrir augun undir það síðasta, þetta særði blygðunarkennd mína.

"Ég mun hugsa til þín á jólunum, ég mun biðja fyrir þér hvar sem þú verður... eh... ég vona að það verði góð aðstaða til að biðja, ég verð á Kanaríeyjum en ég finn mér stað. Hafðu engar áhyggjur. Uh... njóttu þess litla sem þú átt eftir. Sofnaðu bara... eða þú getur vakað ef þú vilt..."

Sigtið var bara nokkuð fyndið.

Garg! Eftir ævintýri kvöldsins (sem m.a.o. gekk mjög vel) get ég engan veginn sofnað, ég er búin að rembast eins og rjúpan við staurinn síðustu tvo tímana, líkaminn vill en hugurinn ekki. Ég er búin að yfirfara allan texta í hausnum á mér aftur og aftur en ekkert virkar. Garg!!!

Í kvöld gerist það.
"Ég elska alla" verður frumsýnt í Ráðhúsi Ölfuss og allir eiga að mæta, reyndar er nánast uppselt en fáein sæti eru laus annað kvöld og aðeins fleiri þann 17. mars.
Um er að ræða söng- og gleðileik. Ef þið viljið heyra meira um þetta þá getið þið hlustað á mig og vinkonu mína á vef Ríkisútvarpsins, velja bara rás 1, 8. mars, morgunvaktin, að endurreisa leikfélag. Amen.

Nú styttist ískyggilega í að við frumsýnum. Ég stefni að því að verða orðin alveg raddlaus og helst bara veik, eða þannig, það væri a.m.k. dæmigert. Ég er langt leidd af stressi og eiginlega ekki mönnum sinnandi en það gerir ekki til þar sem minn maður er í Englandi. Eiginlega hefðum við þurft að æfa í svona mánuð í viðbót en nú er ekkert að gera annað en að krjúpa á kné og biðja um kraftaverk.

Eru virkilega engin úrræði til að efla atvinnulíf í landinu okkar önnur en þau að planta niður eiturspúandi álverum á alla tiltæka bletti? Er þetta arfurinn sem við viljum að gangi til barnanna okkar? Ég neita að trúa því að við Íslendingar séum svo illa gefin að geta ekki fundið neinar aðrar leiðir til þess að bæta kjör landsbyggðarinnar.

Einu sinni flaug félagi manns míns yfir álverið við Hafnarfjörð, það vakti athygli hans að eitthvað var að leka í sjóinn frá álverinu og hann myndaði það. Þessar myndir eru að finna á heimasíðu Sléttunnar en því miður er hún enn niðri eins og aðrar that.is síður, ég skal reyna að birta þær ef síðan kemst aftur í loftið.

Ég er alin upp á norðurlandi og átti ömmu frá Húsavík og afa úr Þingeyjarsýslunum. Mér þykir vænt um norðurland og reyndar landið mitt allt en mér þykir vænna um son minn og framtíð hans. þess vegna skrifaði ég undir þennan lista.

Lítil ninja fór í skólann í morgunn og hitti þar silvíur, spædermenn, nornir, púka og alla hina. Þegar hann kom heim var hann búinn að innbyrða tvö prinspóló, tvo sleikipinna, ís, fullt af karmellum, súkkulaði og öðru drasli. Ég efast um að hann hafi nokkurn tíma áður borðað svona mikið nammi á einum degi. Hell... höfum það einni viku.

Ég lagði mikla vinnu við að hanna öskudagsbúninginn minn í ár, ég gætti þess að greiða mér ekki eða farða, fór ekki í brjóstahaldara, valdi elstu og sjúskuðustu hettupeysuna mína og sjúskaðar gallabuxur og útkoman varð hrein út sagt fabulous. Typical sloppy housewife. Þetta verður seint toppað.

Það kemur líklega ekki á óvart að hér verður ekkert saltkjöt á borðum í kvöld, vitur maður sagði eitt sinn "oft má saltkjöt liggja" og því fær það að liggja í kjötborðum í nóatúni og öllum hinum okurbúllunum, sérvalið eður ei.

Því miður er that.is pósthólfið mitt dáið en ef þið viljið eiga samskipti við mig þá er nýja netfangið mitt arny.leifshjásimnet.is

Veist þú hvað er að vera flippaður?
Þessa spurningu fékk ég frá pilti á fermingaraldri um helgina, það er greinilegt að honum finnst ég óskaplega gömul þó að ég sé ekki sama sinnis en reyndar hef ég verið að reka mig á það að undanförnu að það eru næstum tuttugu ár frá því að unglingurinn ég var unglingur. Þetta er auðvitað fáránlegt enda finnst mér eins og þetta hafi gerst í gær. Gott ef það verða ekki tuttugu ár á næsta ári frá því ég stóð prúðbúin við hlið skólasystkyna minna og játaði kristna trú í heyranda hljóði.

Veit ég hvað er að vera flippaður?
Auðvitað veit ég það!
Ég fann upp á því!

Ef eitthvert ykkar hefur sent mér tölvupóst síðustu daga þá biðst ég afsökunar á að hafa ekki svarað, póstþjónustan liggur niðri um stundarsakir og verður ekki reist við fyrr en þjónustuaðilinn er risinn upp úr veikindum.

Trúi ekki að ég hafi gleymt að segja karrý á ógeðslistann. Ég þoli það reyndar í mjög litlu magni.

Í næsta nágrenni við heimili mitt er verið að reisa nýtt íbúðahverfi og heyrast því reglulega alls kyns skruðningar og læti. Að undanförnu hefur orðið vart við miklar sprengingar þar sem svæðið er undirlagt af klöppum. Rétt í þessu hvað ein ansi öflug við, svo öflug reyndar að sófinn sem ég sit í lyftist upp, buxurnar mínar högguðust, hárið flaksaðist aftur af höfðinu og gluggar og hurðir hristust með látum.
Ég held a.m.k. að þetta hafi verið sprenging frekar en venjulegur jarðskjálfti því að skjálftavakt veðurstofunnar sýnir enga skjálfta í Ölfussi stærri en þrjá á richter síðustu mínúturnar.

Eiginmaðurinn átti óvænt frí frá vinnu í gærkveldi og því notaði ég tækifærið til að grilla oní hann vel blóðuga steik sem var að sjálfsögðu framreidd með dýrindis meðlæti að hætti hússins. Erfingjanum fannst ótækt að afhenda föður sínum afmælisgjöfina á venjulegan máta og faldi hana því í einum eldhússkápnum en faðirinn var ekki lengi að finna hana þar sem drengurinn hafði valið uppáhaldsskápinn sinn; kexskápinn.

Það má víst ekki gleyma því að betri(?) helmingurinn á afmæli í dag.
Til hamingju sæti!

Áskorun!

Erla Hlyns bað um lista yfir mat sem mér þykir viðbjóður. Gjörðu svo vel:

Algjör hroðbjóður:
Svið í hvaða formi sem er
Kjötfars
Bjúgu
Bláberjaskyr.is
Síld í öllum tilbrigðum
Hrossabjúgu
Mysingur
Kavíar í túbum
Saltkjöt
Niðursoðin jarðaber *hrollur*
Hrefnukjöt
Enskur morgunverður
Gellur
Mongólskt þurrkað kjöt

Get pínt oní mig:
Allt brauð sem inniheldur rúsínur
Soyasósa
Fiskborgarar
Steiktur fiskur í raspi
BBQ-sósa
Hvítkál

Veit ekki alveg:
Ég hef ekki enn smakkað baunarétt sem mér þykir góður að undanskildum saltkjötsbaununm.
Einu sinni hef ég borðað góðan indverskan mat og hann var heimatilbúinn með minni hjálp.

Ég er pottþétt að gleyma einhverju. Mér finnst ég ekkert sérlega matvönd en gaman væri að heyra hvað ykkur finnst.
Svo skora ég á Erlu og Hörpu J að gera sjálfar lista.

Bara svo það sé á hreinu þá eru bjúgu líka ógeðsleg.

Jæja, þið fáið víst ekki að vita hvað ég er búin að lesa margar bækur af listanum sem gengur nú á netinu. Ég get samt sagt ykkur að það er u.þ.b. helmingur.

Fokkings blogger!

Akkuru í andskotanum get ég ekki komið inn helvítis færslunni sem ég var að skrifa?

Kjötfars er viðbjóður!

Jeppaklúbburinn 4x4... eða eitthvað.

4 störf sem ég hef unnið við um ævina: leiðbeinandi á leikjanámskeiði, spyrill, sundlaugarvörður, buffetdama.
4 bíómyndir sem ég gæti horft á aftur og aftur og aftur: Muriel´s wedding, One flew over the cuckoo's nest, The others, La double vie de Véronique.
4 staðir sem ég hef búið á: Siglufjörður, Akureyri, Schröcken, Hafnarfjörður.
4 sjónvarpsþættir sem mér líkar: Desperet housewifes, Threshold, ANTM, Lost.
4 staðir sem ég hef heimsótt í fríum: Gardavatn, München, Skara, Barcelona.
4 síður sem ég skoða daglega, (Fyrir utan blogg): Mbl, mikki vefur, that.is/steini, ruv.is.
4 matarkyns sem ég held upp á: Kjúklingapönnsur, folaldasteik, önd a la mamma, saltlakkrís.
4 bækur sem ég les oft: Meistarinn og Margaríta, Harry Potter, Felidae, Þjóðsögur hverskonar.
4 staðir sem ég vildi heldur vera á núna: Í bíó á Walk the line, að borða humar á A Hansen, í nætursundi í hlýjum sjó, á skíðum.
4 bloggarar sem ég klukka: Gvendarbrunnur, Slr, Ernae, Beggi.com.

Nú er ég að fylgjast með alpatvíkeppni kvenna. Amerísku stelpurnar eru frekar svalar, ein skíðaði brautina með kórónu á höfðinu og önnur var með perlufesti um hálsinn. Ótrúlega smart.

Ég er að horfa á listhlaupið á skautum, þá dönnuðu og fallegu íþrótt. Spennan er óbærileg og ég verð eins og eiginmaðurinn yfir spennandi fótboltaleik (er það til?), æjandi og óandi, húrrandi og hlæjandi. Ofboðslega var Kanadamaðurinn sætur í svörtu peysunni utan yfir hvítu skyrtunni, hvílík tilbreyting frá öllu glimmerinu og draslinu sem gerir mann bara hálf vandræðalegan. Svo er ég búin að komast að því að það er miklu skemmtilegra að horfa á beina útsendingu á Eurosport, kynnarnir hafa samúð með keppendum, hvetja þá og ráðleggja keppendum á alla lund. Ég heyri alveg í Samma segja "hertu upp hugann góði minn, þú getur þetta alveg" í beinni útsendingu með tilfinningu í röddinni. Eða ekki.

Ég hef einu sinni nöldrað yfir því að blómabúðirnar auglýsa valentínusardaginn hérlendis og það var á hrekkjavöku( sem ég vil miklu frekar taka upp). Ekki skal meira nöldrað yfir þessum degi elskenda, megi hann fara í rass og rófu.

Ég er með ritstíflu og get því illa komið frá mér því sem ég á að vera að skrifa um akkúrat núna, bíð eftir að andinn komi yfir mig eða í glasið. Ég hef hins vegar talað við nokkra andans jöfra í dag og í kvöld kemur góður gestur sem ætlar að segja mér sögu.

Mér líður heldur betur í dag, ekki síst vegna þess að mig dreymdi að ég gerði mikla uppreisn gegn samfélagi þar sem nánast allir voru steyptir í nákvæmlega sama mót. Ég var ein af örfáum sem hélt sjálfstæðri hugsun og þurfti að losa aðra undan oki valdhafanna. Ég átti að vísu mikla baráttu fyrir höndum en var einhvern veginn uppfull af væntumþykju og trú á að þetta væri bara tímabundið ástand. Svo vaknaði ég. Svo sofnaði ég aftur. Þá var ég knapi á veðhlaupahesti að keppa til úrslita á ólympíuleikum.
Mig dreymir alltaf í lit.

Ég trúi því að maðurinn sé fæddur góður en stundum þarf ég að beita mig hörðu til að missa ekki trúna. Í dag er svoleiðis dagur, fréttamyndir í fjölmiðlum, sögur af fólki og framkoma sumra hefur hrist illilega upp í mér og ég veit ekki alveg hvernig ég á að losna við ógleðina sem er að magnast upp innra með mér. Eins gott að eiginmaðurinn er að heiman því annars fengi hann líklega eitthvað yfir sig sem hann á ekki skilið.

Ég er að hugsa um að hneyksla ykkur með því að blogga þriðja daginn í röð.

Í gærkvöldi fengum við hjónin góða gesti sem átu, drukku og glöddust með okkur. Singstar var haft um hönd og ó boj hvað það er skemmtilegt! Í mínum augum er þetta það eina sem getur réttlætt kaup á pleisteisjon, reyndar hef ég barist hatrammlega gegn slíkum kaupum en mótstaðan fer dvínandi, sérstaklega ef ég fæ alla singstar diskana.

Takk fyrir frábært kvöld öll!

Loksins drullaðist ég til að hlekkja fleiri bloggara.
Ármann þarf vart að kynna enda goðsögn í bloggheimi,
GEN var í sama menntaskóla og ég,
Apinn í tekinu er indælis stúlka, alls kostar óapaleg og það furðulega er að ég vissi ekki að hún bloggaði fyrr en í gær.

Elsku krúttin mín,
Það er alveg með ólíkindum hvað þið eruð dugleg að líta hér við þrátt fyrir algert aðgerðaleysi af minni hálfu. Þarna um árið þegar ég var að velta því fyrir mér að setja teljara á síðuna, spáði einn lesandi (sem nú er held ég hættur að lesa) því að það myndi bara fara illa með sálina mína ef heimsóknafjöldi stæði ekki undir væntingum. Þetta er aldeilis ekki raunin enda hlýnar mér um hjartarætur þegar ég sé ykkur koma aftur og aftur þrátt fyrir bloggþreytu mína. Er ég kannski farin að taka þetta full persónulega?

Nú verða sagðar fréttir:

Ég er hætt að vinna á vinnustað Satans og (loksins) byrjuð á BA ritgerðinni, þó lítið sé þá er þetta mikill persónulegur sigur.

Það snjóar í Þorpinu í dag, þetta er svona "kúra undir sæng með bók og drekka kakó" dagur. Ég hef ekkert kakó drukkið og sængin er víðsfjarri.

Æfingar hjá leikfélaginu ganga ljómandi vel og áætlað er að frumsýna í byrjun mars.

Það er tæpt ár síðan ég greindi frá (þá) fyrirhuguðum flutningum til Þorpsins og nú ætla ég aftur að greina ykkur frá fyrirhuguðum flutningum, að þessu sinni út fyrir landsteinana. Minn ektamaki hverfur af landi brott um næstu helgi en við leibbalingurinn ætlum að bíða sumarsins. Fyrirheitna landið er England. Þar ætla ég að ala upp barn (börn?), skoða landslag, söfn, Stonehenge og fara á Franz Ferdinand tónleika.

Fleira er ekki að frétta í dag, fréttir verða næst sagðar þegar andinn kemur í glasið.

Viljum við ekki öll jafnrétti fyrir börnin okkar?

Mig langar að blogga en veit svo sem ekki um hvað. Á ég að skrifa um að ég var lasin megnið af síðustu viku og að það bráði af mér og að ég er aftur komin með hita? Eða um fundinn sem ég var á í kvöld sem gekk svona glimrandi vel (held ég)? Eða það að ég er hætt að vinna í bili? Eða um bókina sem ég er að lesa?
Ég er að spá í að bjóða ykkur að sjá um þetta fyrir mig:

1. Hver ert þú?
2. Erum við vinir?
3. Hvenær hittumst við fyrst og hvernig?
4. Ertu hrifin/nn af mér?
5. Langar þig að kyssa mig?
6. Láttu mig hafa gælunafn og útskýrðu af hverju þú valdir það.
7. Lýstu mér í einu orði.
8. Hvernig leist þér á mig þegar þú sást mig fyrst?
9. Lýst þér ennþá þannig á mig?
10. Hvað minnir þig á mig?
11. Ef þú gætir gefið mér eitthvað hvað myndi það vera?
12. Hversu vel þekkirðu mig?
13. Hvenær sástu mig síðast?
14. Hefur þig einhvern tímann langað til að segja mér eitthvað en ekki getað það?
15. Ætlarðu að setja þetta á bloggið þitt svo ég geti skrifað um þig?

Vinsamlegast notið kommentakerfið.

Miðað við frammistöðu kvöldsins þá er það algjör skandall að þetta frábæra lag skuli ekki hafa komist áfram.

p.s. bloggleikurinn er í vinnslu.

Mér skilst að mér sé skylt að birta þetta:

Settu nafnið þitt í kommentakerfið og…

1. Ég segi þér eitthvað handahófskennt um þig.
2. Ég segi þér hvaða lag/mynd minnir mig á þig.
3. Ég segi þér hvaða bragð minnir mig á þig.
4. Ég segi þér fyrstu ljósu minninguna mína af þér.
5. Ég segi þér á hvaða dýr þú minnir mig.
6. Ég spyr þig að einhverju sem ég hef velt lengi fyrir mér um þig.
7. Ef þú lest þetta verðurðu að setja þetta á bloggið þitt!

Ég er með einhverja græju á síðunni sem finnur út að hverju leitarvélar hafa leitað og ég verð að segja að svalasti leitarinn vildi finna eitthvað um tordýfilinn sem flaug í rökkrinu. Djöfull langar mig að komast yfir þetta leikrit. Veit einhver?

Þar sem langt er liðið á árið er varla við hæfi að óska ykkur gleðilegs árs en ég geri það samt; gleðilegt ár! Þið eruð eruð æðisleg!

Ég skrifaði víst lítið í desember enda leið sá mánuður að mestu í lyfjarússi þar sem mér tókst að rifbeinsbrotna, jólin voru samt ágæt þrátt fyrir stutt frí og mikla vinnu. Ég er semsagt að vinna hér í þorpinu en ætla að hætta í því starfi um næstu mánaðarmót og takast á við Golíat þann sem á mig hefur sótt undanfarin misseri. Ástæðan er sú að það eru miklar breytingar framundan en ég ætla ekki að skrifa um þær fyrr en nær dregur.

Parísardaman leit við í Þorpi Satans og færði okkur flott gums sem ég veit ekkert hvernig á að nota (bíð eftir leiðbeiningum) en því miður missti ég af henni vegna vinnu en maðurinn minn var hæstánægður með heimsóknina, ég geri mér samt vonir um að hitta hana fljótlega yfir rauðvínsglasi.

Eftir helgina ætla ég að byrja á líkamsræktarprógrammi undir handleiðslu einkaþjálfara, síðan ég byrjaði á núverandi vinnustað hefur ummál mitt stækkað ótrúlega, sérstaklega þar sem ég hef lítið geta hreyft mig vegna áðurnefnds rifbeinsbrots og nú er farið að stefna í óefni.

Sonur minn er farinn að minna óþyrmilega á Homer Simpson enda fær hann stundum að horfa á þættina, það er hins vegar kostur hvað drengurinn er orðinn drulluklár í ensku... ég meina... þekkiði marga 6 ára gutta sem segja við ykkur "tékk ðis át, ðis is só kúl" og vita hvað það þýðir?

Lífið er ágætt, ég var að borða steikt folald og meððí.

Gleðileg jól kæru lesendur!

Jólasveinninn í ár heitir Doddi Makan og hlýtur hann ótakmarkaða virðingu og aðdáun frá þessu heimili.

Nóatún á Selfossi er greinilega heitasti staðurinn um þessar mundir, í síðustu viku hitti ég forseta vorn þar og nú í kvöld var það Biggi í Maus. Hver verður það næst? Það væri nú djöfulli kúl að hitta Alex Kapranos eða Axlar-Björn.

Unaðsleg setning!

"Leikur að hóreríi"

Kaupmannahöfn var yndisleg að undanskildum smá meiðslum.
Ég er óskaplega sybbin þessa dagana og hef afar lítið að segja núna núna, vildi bara láta vita að ég komst heil á húfi heim. Sé til með frekara blogg þegar ég á frí.
Bæjó í bili.

Ég hef takmarkaðan tíma til að blogga núna og hin sjúklega löngun til að vera alltaf í tölvunni er ekki lengur til staðar enda nóg að gerast í raunheimum.

Á morgun tökum við hjónin stefnuna á Kaupmannahöfn þar sem við ætlum að eiga rómantíska daga, versla jólagjafir, borða konfekt og drekka rauðvín. Við komum aftur seint á mánudagskvöld. Ég geri ráð fyrir að eiginmaðurinn taki með sér tölvu svo að kannski flyt ég ykkur fréttir í beinni.

Inga Hlín skoraði á mig í enn einni netkeðjunni en það verður að bíða þangað til ég kem aftur nema það verði svo drepleiðinlegt í Kaupmannahöfn að ég finni ekkert betra að gera en að hanga í tölvunni.

Sé ykkur seinna.

Hvað er möstsí í Kaupmannahöfn og er hægt að skoða á sunnudögum?
Ég er að fara til þangað í fjórða skipti og nú langar mig að sjá borgina eða einhvern skemmtilegan hluta hennar. Einhverjar hugmyndir?

Ji hvað mig kitlar!

7 hlutir sem ég ætla að gera áður en ég dey
1. Klára ritgerðina
2. Eignast a.m.k. eitt barn í viðbót
3. Skoða Macchu Picchu
4. Verða virðuleg fræðikona
5. Finna sjálfa mig
6. Kynnast fleira fólki
7. Verða rík


7 hlutir sem ég get
1. Skrifað ritgerðir
2. Talað út í eitt
3. Farið í handahlaup
4. Farið ein í bíó eða til útlanda án þess að leiðast eða skammast mín
5. Sagt nei
6. Sungið í kór
7. Elskað

7 hlutir sem ég get ekki
1. Borðað svið
2. Lifað án vina og fjölskyldu
3. Hlustað á Hemma Gunn á Bylgjunni á sunnudögum
4. Hlaupið hratt
5. Beðið eftir að fara til Kaupmannahafnar
6. Gengið á mjög háhæluðum skóm
7. Lifað án internetsins

7 hlutir sem heilla mig við hitt kynið
1. Fagurlega mótaðar og kraftalegar hendur
2. Útgeislun
3. Húmor
4. Yfirvaraskegg (þó að maðurinn minn harðneiti að safna)
5. Gáfur
6. Munnsvipur
7. Manngæska

7 frægir karlmenn sem heilla mig
1. Kris Marshall
2. Alex Kapranos
3. Joaquin Phoenix
4. Christian Bale
5. Hugh Laurie
6. Robbie Williams
7. Biggi í Maus

7 orð eða setningar sem ég segi oftast
1. Já
2. Nei
3. Leifur
4. Þór
5. Veistu hvar … er?
6. Kannski
7. Jæja

7 manneskjur sem ég ætla að kitla
1. Ása Lára
2. Kaffikella
3. Steini bróðir þó hann sé ekki bloggari
4. Hjördís
5. Parísardaman
6. Inga Hlín
7. Hryssa

Það er alltaf hátíðleg stund þegar Bókatíðindi læðast inn um bréfalúguna hjá mér og þess vegna er dagurinn í dag góður dagur. Það er slatti af bókum sem mig langar að lesa en heldur færri sem ég kæri mig um að eiga. Ég er lítið spennt fyrir íslensku barnabókunum en þær þýddu þykja mér sumar aðeins bitastæðari. Mig langar mest að lesa barnabækurnar hans Jógvans Isaksens enda hef ég gaman af fullorðinsbókum hans en einhverjar fleiri á ég eflaust eftir að lesa og sumar er ég búin með. Verst að það kom ekki ný bók um Abarat.

Eftir fyrstu skoðun eru þetta þær bækur sem ég er spenntust fyrir:

Afturelding - Viktor Arnar
Frægasti maður í heimi - Kristjón Kormákur
Vetrarborgin - Arnaldur Indriða
Yosoy - Guðrún Eva
Þriðja táknið - Yrsa Sigurðardóttir
Eldgos - Ari Trausti
Játningar Láru miðils - Páll Ásgeir

Takið eftir að flestir höfundanna heita tveimur nöfnum. Ætli það sé erfiðara að meika það í bókabransanum ef maður heitir bara einu nafni?
Miklu fleiri bækur ætla ég mér að lesa og sumar eru þegar afgreiddar, það er nefnilega ljómandi gott bókasafn hér í Þorpinu.

Ég brá mér í borgarferð um helgina og hafði það náðugt, fór í heimsóknir, át og svaf, horfði svo á dauflega Eddu í gær, guði sé lof fyrir Silvíu Nótt. Fyrirtakshelgi alveg hreint.

Ég er ekki uppfull af bloggþörf þessa dagana og því gæti vel farið svo að ég taki mér smá frí í einhvern tíma en kannski ekki. Það verður þá aldrei mjög langt. Lifið heil.

Þessir nafnar eru mestu mátar og hjálpast stundum að við að afgreiða og opna jólapakka.
Til hamingju með daginn elsku pabbi.

Það er ekki eins og ég nenni ekki að blogga. Þær eru ófáar mínúturnar sem ég hef setið við tölvuna og ausið úr mér skemmtilegheitum og fúlheitum í bland en allt kemur fyrir ekki, ódauðleg snilld er nú dauð vegna þess að bévítans nettengingin er með derring og kemur og fer eins og hún hafi engum skyldum að gegna. Einhver Homer hjá fjarskiptafyrirtæki Fjárans lét sér detta í hug að ýta á eins og einn eða tvo takka og restin er histería.

Ég hafði mjög gaman af þættinum um INXS enda var ég ákafur aðdáandi um fermingaraldurinn, það má því gera ráð fyrir að ég verði föst yfir kassanum næstu sunnudagskvöld. Það gladdi mig einnig ósegjanlega að sjá að Ódáðaborg mætir aftur á skjáinn í kvöld, fantafínir þættir og svo er ég líka pínu skotin í honum þessum.

Ég man nú ekkert markvert í augnablikinu en það er aldrei að vita hvað gerist þegar nettengingin dettur út næst.

Jú heyrðu mig nú! Hún slr frænka mín fæddi stúlkubarn þann 3. nóvember! Til hamingju!

Fjarskiptafyrirtæki Satans hefur haldið mér frá blogginu að undanförnu. Nettengingin dettur inn og út og enginn virðist vita hvernig á að kippa þessu í lag. Nú er hún inni og vonandi varir það ástand að eilífu.

Héðan er svo sem ekkert merkilegt að frétta svo að það er engin þörf á að lesa lengra.

Leikfélagið er að verða ansi smart, áheyrnarpróf fóru fram í gærkveldi og það er sko engin spurning að það er ekki hörgull á hæfileikaríku fólki í Þorpinu.

Mig dreymdi furðulegan draum um bloggara sem ég hef aldrei átt orðaskipti við og les bara í laumi en þótt ég verði pínd til dauða mun ég aldrei ljóstra upp um innihald draumsins. Djöfull var hann samt skemmtilegur.

Sonur minn, snillingurinn, hringdi í lögguna í gær til að kvarta yfir foreldrum sínum. Nú bíð ég bara eftir að barnaverndanefnd láti sjá sig.

Verð að hætta núna, það er einhver að ban

Á morgun ætla ég að útvega mér hvíta rós til að festa í barminn og svo bruna ég í bæinn. Ég hvet alla til að gera það sama, líka stráka og kalla. Ef þið hættið að vinna en komist ekki á fundinn, ekki fara heim að þrífa, hringið frekar í vinkonur ykkar og gerið eitthvað skemmtilegt saman eða eigið góða stund með sjálfum ykkur.
Sjáumst í bænum.

Það hefur margoft sýnt sig að blogg er merkilegt fyrirbæri og til margra hluta nytsamlegt.
Fyrir allmörgum mánuðum fékk Ágúst Borgþór* nokkuð sérstakan og forvitnilegan gest inn á kommentakerfið sitt. Ég elti þennan furðufugl inn á heimasíðu hans** og við tók spennandi lestur, það var samt augljóst að maðurinn var frekar veikur í höfðinu en hann var jafnframt áhugaverður. Síðar kom í ljós að Ágúst var ekki sá eini*** sem naut þeirra vafasömu forréttinda að "kynnast" manninum.

Ég veit fátt sniðugra en þetta.
Ágúst, varst þú með í plottinu eða ert þú jafn hissa og við hin?

*
** (einu sinni var meira efni á síðunni)
***

það er víst tímabært að sýna eitthvað lífsmark.
Ótrúlegur fjöldi kvittaði og það er bara gaman að því. Ástæðan fyrir þessari heimtufrekju var sú að ég heyrði um óvæntasta fólk í fjölskyldunni og vinahópnum sem les en heimturnar voru ekki sérlega miklar á þeim vígstöðvum en þeim mun meiri á öðrum.

Lífið gengur sinn vanagang hér í Þorpinu, ekkert sérlega fréttnæmt kannski. Kórinn er byrjaður að æfa jólalög og ég á í harðri baráttu við jólafólið sem í mér býr, ég ÆTLA samt ekki að sleppa því út fyrr en í byrjun desember og beiti sjálfsdálleiðslu til þess að gleyma jólalögunum milli æfinga.

Fjölskyldulífið er gott og alls konar samningaviðræður eru í gangi, við erum jafnvel að komast að niðurstöðu um húsgögn í stofuna og smá fíniseringar sem nauðsynlegar eru.

Við vorum nokkur sem hittumst á bókasafninu í síðustu viku í þeim tilgangi að endurvekja leikfélag Þorpsins og erum nú þegar farin að huga að verkefnum vetrarins. Mér líður pínu eins og ég sé aftur komin í menntaskóla en samt ekki.

Ég er búin að hlusta mikið á nýju Franz Ferdinand plötuna og varð ekki fyrir vonbrigðum, hún er töluvert öðruvísi en fyrri platan, bæði harðari og blíðari og bara frekar góð. Reyndar leið síðasta vika í einhverju móki því að ég var meira og minna með þessa tónlist í eyrunum.

Ég get ekki opnað augun á morgnanna nema með aðstoð augndropa. Hvað á það að þýða?

Lítill fugl hvíslaði því að mér að ég ætti laumulesendur sem láta aldrei vita af sér. Nú ætla ég að biðja ykkur, kæru vinir, að kvitta í kommentakerfið og ég neita að blogga meira fyrr en allir hafa kvittað.

p.s. til hamingju með nýju íbúðina Íris!

Mömmu finnst ég ekki nógu dugleg að blogga og það er svo sem alveg satt en um hvað á kona að skrifa þegar hún er "einstæð" móðir sem liggur í krankheitum og les Ísfólkið til að þurfa ekki að reyna á heilann? Ég hef ekki haft orku í að hanga á netinu eða horfa mikið á sjónvarpið en ég afrekaði þó að sjá batsjelorinn í gær. Það var gaman. Ég held með þeirri sem sagði "Steini, þú veist hvað þú átt að gera!" þó ég muni ekkert hver það var. Sú sem sagðist koma sterklega til greina að fá ekki rós... tja... nóg um batsjelorinn sem mátti ekki heita Piparsveinninn en þátttakendur og stjórnendur nota samt íslenska orðið markvisst.

Eiginmaðurinn er búinn að vera á flandri með kúbverskum ráðherrum en ég endurheimti hann seint í gærkvöldi, hafði hann heimboð til Kúbu og ekta Havanavindla í fórum sínum. Minn bíður áramótanna.

Ég vil vekja athygli á að ég skráset merkileg móment í lífi sonar míns, hann á hlekk hér til hliðar. Sko mamma, ég er búin að blogga fullt í vikunni.

Nú ætla ég að fara og segja nei við sameiningu sveitarfélaga í Ölfusi og Flóa.

Á ferð minni um bæinn áðan sá ég verslunarstúlku terrorisera gamlan mann til að kaupa handa henni blóm, börn á leið heim úr skóla, fjúkandi laufblöð og þorpsrónann slagandi.

Karníval eru snilldarþættir. Ég missti reyndar af síðasta þætti í fyrri seríunni, getur einhver sagt mér hvað gerðist?
Dáldið seint... ég veit.

Það kviknaði hjá mér smá pæling þegar ég las færslu hjá Hildigunni þar sem hún var að velta fyrir sér hvernig linkalistinn liti út eftir tíu ár.

Ætli ég verði enn að blogga eftir tíu ár?
Eftir tíu ár verð ég 41 árs. Ég á frekar erfitt með að sjá fyrir mér að fína frúin sem ég verð, setjist niður milli kvenfélagsfunda og tedrykkju til þess að blogga, samt eru margir bloggarar sem ég les að nálgast fertugt eða þegar orðnir það.

Ég var reyndar rétt í þessu að fatta að ég átti tveggja ára bloggafmæli fyrir tveimur dögum og akkúrat þá var ég í feiknastuði. Mér finnst þetta enn gaman og á meðan svo er þá mun ég halda þessu áfram, enda er blogg í eðli sínu sjálfhverft.

Ég á ekki jakkaföt.
Ég er aðeins yfir kjörþyngd.
Ég er nær því að vera ljóshærð en dökkhærð.
Ég er 158 sentimetrar á hæð.
Ég er kona.
Ég á ekki séns.

Ætli það sé ekki best að ég hendi mér í sjóinn.

Þið músíkölsku lesendur!
Hvar fæ ég létta og skemmtilega bók til að rifja upp nótnalestur?
Ég hef ekki lesið nótur síðan ég var barn en langar óskaplega til að byrja aftur.

Ég missti röddina á kóræfingu í gær.
Í dag er einhver kvefdrulla að skríða í mig.
Á laugardag á ég að syngja opinberlega í fyrsta skipti í mörg ár.

Einhver fleiri ráð en sólhattur og c vítamín?

Þetta sBaugsmál er orðið hið undarlegasta og eiginlega til vansa fyrir alla sem að því koma en bojoboj hvað það hefur mikið skemmtanagildi.
Ég get ekki beðið eftir bókinni hennar Bónínu*.

*Uppnefni þessu þjófstal ég frá ágætum bloggara og vona að ég fái ekki skömm í hattinn fyrir.

Mig dreymdi draum.
Ég var að hafa mig til fyrir Franz Ferdinand tónleika þegar ég fékk þær fréttir frá gamalli skólasystur sem starfaði hjá kærunefnd bloggara að einn slíkur hefði margoft kært mig en kærunni alltaf verið vísað frá sem mesta bulli og vitleysu. Bloggarinn hataði mig hins vegar heitt og innilega og fór ekki dult með það á bloggsíðunni www.ljufa.blogspot.com. Hann hafði semsagt, mér til háðs, tekið upp nafnið mitt að viðbættum fáeinum tvöföldum vöffum og opnað eigin síðu, ári eftir að ég byrjaði. Hann (því þetta var svo sannarlega karlmaður) skrumskældi allar færslur mínar á sinni síðu og vann að því hörðum höndum að fá einkarétt á urlinu mínu. Ég þekkti ekki ástæðurnar fyrir þessu einelti, líklega leiddist honum bloggið mitt bara svona óskaplega. Ég missti af tónleikunum þar sem ég fattaði að þeir voru í öðru landi og að ég átti ekki miða.
Kannski er ekki hollt að lesa Pratchett fyrir svefninn.

Undur og stórmerki áttu sér stað í dag! Fúla konan í búðinni brosti! Og eins og það sé ekki nóg þá grínaðist hún og hló líka!!!
Mér brá svo að ég fékk harðlífi!

Mig vantar skemmtilegt og vel launað starf með sveigjanlegum vinnutíma og miklum fríðindum.
Fyrr í dag fór ég og kynnti mér aðstæður á einum vinnustað en starfið sem var í boði er algjört skítadjobb og launin ekki mönnum bjóðandi. Vinnuveitandinn er reyndar svo áfjáður í að fá mig til starfa að hann ætlar að búa til snyrtilegt starf handa mér ef hann fær umboð til þess og það þrátt fyrir að ég er orðin alveg glær í framan og með augabrúnir út um allt. Samt ætla ég í plokkun og litun á eftir, hver veit nema það auki eftirspurnina umtalsvert. Ég myndi aldrei ráða glæra, loðna manneskju í ábyrgðastarf.

Hvar er Pulla?
Það vantar sárlega einhvern til að blogga um O.C. og birta myndir af sætum strákum.

Mátti til:

http://www.kvikmynd.is/myndband.asp?id=1450

Þau fimm sem ég klukkaði hafa öll staðið sína pligt og fá að launum eilíft þakklæti. Reyndar var Pezkallinn með einhvern derring og sendi til baka áskorun á mig. Ég á semsagt að semja tvo lista, hvorn um sig a.m.k. fimm atriði.

Fjórtán hlutir sem ég held upp á þótt enginn annar geri það:
1. Fílasaltlakkrísreimar
2. Kvöldsögur á Bylgjunni
3. Pandasúkkulaði með hindberjafyllingu
4. Myndirnar á veggnum í bílskúrnum
5. Íslenskir þjóðdansar
6. Leiðarljós
7. Tarzanblöð
8. Ostur á pylsu í brauði
9. Fíflar
10. Kolbrún Halldórsdóttir
11. Family guy
12. Kirkjugarðar
13. Kebab
14. Sköllóttir karlmenn


Tíu hlutir sem ég þoli ekki en (sumir) aðrir elska:
1. Jarðaberjasulta
2. Támjóir skór
3. Breezer
4. Sálin hans Jóns míns (þ.e. bandið)
5. Grínmyndir sem byggjast á vandræðagangi
6. Indverskur matur
7. Farsímar með myndavélum
8. Framhaldsmyndir frá Disney
9. Fótbolti
10. Andrea Boccelli

Svo hata ég fullorðið fólk sem getur ekki skrifað einföld orð eins og "eitthvað" á eðlilegan máta.
Þa hlídur a vera eikkva a folki sem sgrivar sona. En flest sæmilega þenkjandi fólk er líklega sammála mér.

Jæja, mér er það í sjálfsvald sett hvort ég skora á fleiri en þar sem allir eru uppteknir af klukkinu þá ætla ég ekki að skora á neinn en hvet ykkur öll til þess að skrifa svona lista.

Meiri keðjuvitleysa

1. Go into your LJ’s /blogs archive.
2. Find your 23rd post (or closest to).
3. Find the fifth sentence (or closest to).
4. Post the text of the sentence in your blog along with these instructions.

Þar sem færslan var stutt ætla ég að birta hana í heild:

laugardagur, október 11, 2003

Ó MÆ GOD!!!

Það er samsæri í gangi og ég skal komast að því hver ber ábyrgð á því. Það er hætt að framleiða fílasaltlakkrísreimar!!!
Þetta er reginhneyksli!
Skyldu bókmenntafræðingar standa fyrir þessu?

Síðar komst ég að því að þetta var lygi biturs vídeóleigueiganda.

Dagurinn í dag er einn af þessum merkisdögum í fjölskyldunni minni. Tvö glæsimenni fæddust þennan dag, annar fyrir rétt rúmlega þrjátíu árum en hinn fyrir fimmtán árum.
Til hamingju með daginn strákar, það er greinilegt að aldurinn fer mildum höndum um meyjarnar sem þið eruð.

. 

. 

Það er einhver klukkleikur í gangi á meðal íslenskra bloggara og I´ve been hit. Sem þýðir að ég á að segja telja upp fimm staðreyndir um sjálfa mig. Loksins fæ ég afsökun til að blogga um mig og mig eina (bíddu... en þú ert endalaust að blaðra um sjálfa þig! Nú? Ég hélt að ég væri að þessu til að bjarga heiminum, auðvitað skrifa ég um sjálfa mig, ég meina... hvering er annað hægt? Þú veist að ég er æði er það ekki? En hvað með öll börnin sem svelta og eru beitt ofbeldi? Geta þau ekki bara bloggað sjálf? Sjálfumglaða drósin þín!)

1. Ég þoli ekku sjálfumglatt fólk.

2. Mig langar ótrúlega mikið í hund.

3. Ég er ekki enn búin að ákveða hvað ég ætla að verða þegar ég verð stór.

4. Mig langar að skoða Machu Picchu en er hrædd um að ég eigi aldrei eftir að gera það.

5. Mig dreymir í lit.

Reglurnar eru þær að ég á nú að klukka fimm aðra. Þau heppnu eru Parísardaman, Hr. Pez, Uppglenningur, Magnþóra og Hjördís.

Á forsíðu Morgunblaðsins í dag:

Fylgst með hundruðum íslamista

Hvenær hættu menn og konur að tala um múslima?
Eru íslamistar kannski ekki það sama?
Missti ég af einhverju?

Það er gaman að bjóða fólki heim þegar maður hefur nægilegt pláss til að taka á móti því.
Það er merkilegt hve margt er öðruvísi þegar maður býr í stóru húsnæði, sem dæmi má nefna að ég er meira en helmingi fljótari að laga til í 200 fermetra húsinu mínu en ég var í 72 fermetra íbúðinni.

Ég sakna Hafnarfjarðar pínulítið en aðallega vegna nágrannanna ská á móti. Við erum hins vegar dugleg að hittast svo að þetta sleppur. Ég sakna höfuðborgarsvæðisins ekki baun, ég er hvort eð er enga stunda að skreppa þetta.

Þorpið er indælt. Á daginn berst inn til mín kliðurinn frá leikskólanum hinum meginn við göngustíginn, seinnipartinn og á kvöldin ríkir kyrrðin ein.

Á morgun ætla ég að byrja í kór nema mér verði úthýst fyrir falskan söng og almenn leiðindi.

Í kommentakerfinu er mér brigslað um leti á bloggvellinum. Það er rétt, ég hef um annað að hugsa þessa dagana. Ég er að bíða eftir svari við atvinnuumsókn en þið fáið ekkert meira að vita, a.m.k. ekki í bili.

Í kvöld ætla ég að bjóða saumaklúbbnum mínum heim í fyrsta skipti síðan ég flutti svo að ég er farin að baka og skúra.

Þetta var magnað!

Hæ!
Ég er að fara í Kaplakrika að hlusta á þessa. Það er svalt.
Bæ.

Ég fór í berjamó í blíðunni. Það var indælt.

Hálfgert heilsuleysi kemur í veg fyrir mikinn tölvuáhuga. Þetta er svona "of slöpp til að gera gagn/of hress til að liggja í rúminu". Hvernig stendur á því að ég fæ oft svona hálfgildings pestar (pestir? nenni ekki að fletta því upp), því get ég ekki fengið að afgreiða þetta með einni almennilegri árlega?

Æ, maður á ekki að kvarta svona. Einu sinni kvartaði ég yfir einhverju smotteríi hérna og fékk þvílíku skammarræðuna í kommentakerfinu mínu.

Ég verð tölvulaus hvað úr hverju því að skarnið mitt þarf að komast í viðgerð. Veit ekki hvort eða hversu mikið ég nenni að blogga á risaeðluna.

Ég má þó til með að segja frá því að stóri strákurinn minn er byrjaður í skóla! Óskaplega líður tíminn hratt.

Sie ist die wahre Königin seines Herzens...

Verður Þórey Edda næsta furstynja í Mónakó?

Fyrir tíu mínútum sat ég fáklædd úti á sólpalli með moggann í annarri og kaffibolla í hinni og velti fyrir mér hvort ég ætti að sækja mér sólvörn. Ég ákvað að láta verða af því og skaust inn, þegar ég kom aftur út skall á þvílíkt úrhelli að annað eins hefur varla sést á Íslandi. Þetta finnst mér notalegt.

Fyrir ári síðan:

mánudagur, ágúst 16, 2004
Sumarið 1996 vann ég á litlu sveitahóteli á suðurlandinu. Þær fáu fríhelgar sem ég átti voru vel nýttar í félagsskap góðra vina en heldur lágdautt var yfir ástarlífinu. Það var á hlýju föstudagskvöldi sem ég stóð ein í biðröð við skemmtistað þar sem ég ætlaði að hitta vinkonu. Næst á undan mér í röðinni voru nokkrir strákbjálfar með skrílslæti, einn þeirra eyddi miklum tíma í að fá annan til að teygja tunguna upp í nef en ég leit undan og veit því ekki hvort hann lét verða af því. Fljótlega eftir að steratröllin í dyrunum hleyptu mér inn var sá tungulangi kominn á slóð mína og gerði sitt besta til að ná mér út af staðnum og heim í ból. Hinn, þessi sem vildi svo gjarnan sjá tungu í nefi félagans, stóð yfir okkur og skaut á vininn alveg þar til sá gafst upp og tilkynnti mér að ég væri barnaleg að vilja ekki sofa hjá honum. Félaginn nýtti sér hins vegar tækifærið og var öllu tunguliprari, áður en ég vissi var ég orðin bálskotin og örfáum vikum seinna var ég flutt inn til hans. Að þremur árum liðnum kom frumburðurinn. Fyrir nákvæmlega ári síðan hittumst við í kirkju að viðstöddu fjölmenni og gengum út sem eitt.Ást við fyrstu sýn er ekki til en hinsvegar kannski við aðra... eða þriðju. Ég hef aldrei spurt hvort tungan hafi náð upp í nef.

Jæja, ég setti inn eitthvað dótarí, nú er bara að bíða og sjá hvort egóið bíði þess bætur.

Hvað finnst ykkur annars um frumvarpið um samkynhneygða?

Niðurstöður
Af þeim tólf sem svöruðu, mæla átta með því að ég fái mér teljara, þrír virðast þjást af valkvíða (reyndar er ég ekki viss um hvað einn þeirra á við þar sem ég veit ekki hvað hsfs kílómetrateljari er) og einn segir blákalt nei þar sem hann óttast að egóið mitt höndli ekki fáar heimsóknir. Ég er að hugsa um að láta vaða og nú spyr ég ykkur, lesendur góðir, hvaða teljari er sniðugastur og hvar fær maður svona extreme tracking? Eða er kona komin út í óþarfa persónunjósnir með slíkum búnaði?

Óformleg skoðanakönnun...
á ég að fá mér teljara?

Ég lagði nokkra bloggara í viðbót í hlekki.
Magnþóra er skemmtileg stelpa sem vinnur með mér.
Kirsuber er ljúflingur sem ég þekki ekkert en fær mig alltaf til að brosa út í annað og stundum bæði.
Harpa er rithöfundur og hannyrðakona, hún skrifaði þessa bók.
Majae er opinská stúlka sem lætur ekkert stöðva sig.

Í fyrradag fjárfestum við í borðstofuborði. Nú þarf ég bara að safna pening svo ég geti keypt mat.
Í gær keyptum við nýja ruslatunnu. Ég þarf ekki að safna rusli því ég á nóg af því fyrir.

Líklega var það bara ég sjálf sem útskúfaði mér af Mikka. Búin að laga það í bili, þökk sé Óla Gneista.