Ég skil ekki alveg

Af hverjur er Ólafur að tjá sig um málefni einstakra banka? Er hann það vel tengdur inn í bankana að hann geti talað um þeirra mál?

Þurfum við ekki nýjan forseta?

Til að fyrirbyggja misskilning

vil ég koma því á framfæri að ég óska þess að allir lifi vel og lengi.

Staðsetning

Það er til staður í helvíti fyrir Davíð Oddsson.

Gleði

Held með nýju ríkisstjórninni.

Rock on.

Áfram Framsókn?

Eftir nýjasta útspilið er það alveg á hreinu að framsóknarflokkurinn fær ekki mitt atkvæði í komandi kosningum.

Feelings...

Tilfinningarnar eru enn blendnari í dag en í gær.

Og mig langar enn að vita þetta með lagið.

Í frjálsu falli

Og hvað svo?

Veit engin/n hvað lagið heitir?

Interesting times

Við lifum á áhugaverðum tímum, allt of áhugaverðum.
Ég hef blendnar tilfinningar gagnvart viðburðum dagsins og get ekki gert upp við mig hvaða hvatir lágu að baki.

Nennir svo einhver að segja mér hvaða lag er spilað undir auglýsingunni um nýja þáttinn hans Jónsa.

Hörður Torfa og afleiðingar orða II

Eftir að hafa hlustað á viðtalið við Hörð er ég algjörlega sannfærð. Það hefur tekist að snúa fullkomlega út úr orðum hans.

Sjá hér: http://mbl.is/media/96/1196.wav

Hörður Torfa og afleiðingar orða

Ég skil vissulega hvað hann var að fara með orðum sínum í gær þótt ég hefði orðað það öðruvísi. Eða jafnvel sleppt því að orða það.

Mér finnst hins vegar frámunalega heimskulegt að láta þessi orð fæla sig frá því að mótmæla. Davíð og hans pótintátar sitja enn sem fastast og sömu aularnir eru í FME og leyfðu að íslenska þjóðin yrði sett á hausinn. Geir og Ingibjörg leiða enn ríkisstjórnina þrátt fyrir veikindi. Veik manneskja með fulla starfssorku hefur eflaust gott af því að vinna en þegar starfið skiptir sköpum fyrir heila þjóð og því fylgir að auki gríðarlegt álag, þá á fólk að hleypa öðrum að.

Litli krumminn minn er lasinn, annars væri ég á leið í bæinn núna. Í staðinn sit ég við tölvuna, íklædd appelsínugulri peysu.

Klæðist uppáhalds litnum okkar allra og drífið ykkur niður á Austurvöll.

Nýr litur í tilefni dagsins

Ég er stolt af mótmælendum í dag, kakó og ættjarðarsöngvar er málið.

Tímabærar kveðjur

Gleðileg jól og gæfuríkt ár!
Sprengjum af okkur rassgatið og dönsum inn í nýja árið með von í hjarta.

Kveðja frá pakkinu á Heinabergi 19.

Enga fýlu!

Óþarfi að láta fúlar færslur standa efst of lengi.

Pestin er á undanhaldi þökk sé Alexander Fleming og Howard Walter Florey. Nú eru bara endalaus skemmtilegheit í gangi, jólatiltekt, skreytingar, pælingar og undirbúningur fyrir nýtt starf.

Stanslaus gleði!

Djöfull er þetta þreytandi

Ég er búin að vera meira og minna lasin í heilan mánuð. Skítslöpp með hor í hausnum. Í hvert skipti sem ég held að þetta sé búið og hætti mér út fyrir hússins dyr, rýk ég aftur upp í hita. Nú er ég búin að vera á sýklalyfjum í viku og ekkert hefur breyst.

Heitasta helvítis andskotans helvíti.

Afsakið, ég þurfti að koma þessu frá mér.

Efri skáparnir

eru hreinir.

Ástand!

Fjölmiðlar þurfa að fara í algera naflaskoðun þegar Spaugstofan ber á borð beittustu ádeiluna.

Klukk!

Ég var að lesa Pezkallinn aftur í tímann, sá að hann klukkaði mig. Held ég láti bara vaða enda ekkert betra að gera í volæðinu. Here goes:

1. Fjögur störf sem ég hef unnið um æfina:
Buffetdama á hóteli
Frystihúskerling
Viðtalandi
Safnvörður

2. Fjórar íslenskar bíómyndir sem ég held uppá:
Jón Oddur og Jón Bjarni
Astrópía
Svo á Jörðu sem á himni
Sódóma

3. Fjórir staðir sem ég hef búið á
Siglufjörður
Schröcken
Northampton
Þorlákshöfn

4. Fjórir staðir sem ég hef heimsótt í fríum:
Lago di Garda
Figueres
Cornwall
Kaupmannahöfn

5. Fjórir sjónvarpsþættir sem mér líkar:
Trial & retribution
Desperate housewives
Riget
Dagvaktin

6. Fernt sem ég held uppá matarkyns:
Folaldakjöt
Fajitas
Franskar með osti
súkkulaði

7. Fjórar bækur sem ég hef oft lesið:
Meistarinn og Margaríta
Ár hérans
Nornirnar
Bróðir minn Ljónshjarta

8. Fjórir staðir sem ég myndi vilja vera á núna:
England
Heima
England
Heima

9. Fjórir bloggarar sem ég klukka:
magtot
h1
kaffikella
apinn í tekinu.

Ekki datt mér í hug

að einhverjir litu enn hingað enda kreppa hér eins og annars staðar. Sjálf hef ég ekki gert það í margar vikur.

Ég er eins og allir hinir, veit ekki hvað verður á næstu vikum og mánuðum og skil ekkert hvað er að gerast. Það er allt farið til andskotans og við lifum bara í einhverju limbói.

Annars er ekki allt hábölvað, ég er ánægð með vinnuna mína og hlakka til eftir áramót en þá mun ég skipta mér af menningarmálum sveitarfélagsins í auknum mæli. Er ekki sagt að menning blómstri í kreppu?

Mig langaði

að sýna lífsmark en þegar ég var búin að opna gluggann datt mér ekkert í hug.

Björk ætti frekar að syngja gegn fátækt

Gerðu það sjálfur Bubbi ef þetta er þér svona hugleikið.

Blogg?

Ég var búin að steingleyma að ég ætti bloggsíðu. Hef ekki kíkt á hana síðan ég reit síðast hér inn. Kannski verður þetta bara ógurlega langt blogghlé og kannski hætti ég alveg en ég ætla að byrja á að fara til Englands og hvíla mig á blogginu. Ef einhver saknar mín þá er ég á facebook.com undir mínu rétta nafni og þykir gaman að eiga vini.

Lifið heil.

Skjálftablogg

Þetta er orðið gott og nú er mál að linni.
Annars flyt ég aftur úr landi.

Uppörvandi!

Tvíburar: Ábyrgðarhlutverk þitt er stærra en þú gerir þér grein fyrir. Orka þín og ákvarðanir láta hlutina gerast, ekki bara fyrir þig. Þú skiptir samfélagið máli, líka þegar þú sefur.

Tekið af mbl.is

Mómó búin

Sýningum á Mómó er þá lokið og ekki laust við að ég eigi eftir að sakna þess. Ég lék síðustu sýninguna með hor í haus og er núna óttalega volæðisleg. Mig langar að kvefið fari og vorið komi. Þetta er búinn að vera erfiður vetur.

Skólahreystis?

Kommon!

Misjafn er smekkur manna

Ég meika ekki Garðar Thor Cortes, mér finnst hann hreinlega ekki hafa nógu fallega eða kraftmikla rödd. Má ég þá heldur biðja um Eddie Vedder.

Emil situr dolfallin yfir Garðari. Með snuð í munni og stóra gyllta perlufesti um hálsinn.

Frumsýning afstaðin

Ég hef víst ekki gefið mér neinn tíma til að upplýsa heiminn um tilveru mína vegna þess að ég er of upptekin við að lifa lífinu. Leikfélag Ölfuss frumsýndi fjölskylduleikritið Mómó eða skrýtin saga um tímaþjófana og barnið sem frelsaði tímann úr klóm þeirra síðasta laugardag. Sýningar helgarinnar gengu glimrandi vel en fólk mætti vera duglegra að kaupa sér miða.

Enn einu sinni er skítapest mætt í húsið, krónprinsinn er búinn að vera með háan hita síðan á fimmtudag og sá litli síðan á laugardag. Aumingja börnin mín eru bara sárlasin og vesöl og ósköp lítið sem ég get gert fyrir þau. Hundleiðinlegt alveg.

Allir að mæta í leikhús um næstu helgi.

Illugi bjáni

Ég get ekki með nokkru móti séð hvaða tilgangi það þjónar að birta myndir af spámanninum í einhverju tímariti. Þetta minnir mest á óþekkan krakka. Hví í ósköpunum skyldi maður sína meðborgurum sínum virðingu ef maður má, lögum samkvæmt, sleppa því?

Ég ber litla virðingu fyrir Illuga núna.

Ó mæ effing...

Framhaldsmynd?

SKAMM ÁRBORG!

Ég var að koma af forsýningu hjá Leikfélagi NFSU á rokksöngleiknum Til Sölu! Það er dásamlegt að sjá og heyra hversu hæfileikaríkir þessir krakkar eru og ég lofa að það verður enginn svikinn af sýningunni. Sýnt var í ófullgerðum menningarsal Hótel Selfoss og það er það sem hneykslar. Þessi salur hefur staðið ókláraður í 25 ár skv. mínum heimildum. Fullklárað yrði þetta eitt flottasta leikhús/tóneikastaður/kvikmyndahús á landinu. Auðvitað kostar allt peninga en það getur bara ekki verið svo ótrúlega dýrt að einangra og mála svona sal enda pottþétt dýrara að láta þetta standa ónotað. Ég ætla rétt að vona að ég fái að njóta þess að fara í mínu fínasta pússi og horfa á fleiri menningarviðburði þótt það sé vissulega sjarmi yfir því að sitja í leikhúsi íklæddur vetrarfatnaði og undir teppi.

Þetta reddast

Hér stendur allt til bóta, húsbóndinn kominn heim, heilsan komin í bæinn og allir giska kátir.

Pestarbæli (aumingjablogg)

Heimilið hefur verið sannkallað pestarbæli síðan í byrjun febrúar, allar mögulegar og ómögulegar pestir hafa fundið sér samastað hér og má telja veikindalausa daga á fingrum annarrar. Sú nýjasta er magapestin og hefur hún nú laggt mig og krónprinsinn. Þetta hefur áhrif á leik og störf og er mín eina ósk sú að þessu fari að ljúka og að eðlilegt líf hefji innreið sína á ný.

Grasekkjustand

Ich bin eine grasekkja, maðurinn á stanslausum þvælingi og gistir nú á þýskri grundu. Ég hef svo sem ekki tíma til að láta mér leiðast, eiginlega hef ég ekki einu sinni tíma til að hugsa um börnin mín nema þegar þau sofa. Gaman aððessu.

Baráttukveðjur í Eyjahraunið.

Drama

Þú ert léttsteikt dramadrottning.

Ef dramadrottningar væru hamborgarar sem fengjust
"rare",
"medium rare",
"medium"
og "well done"
værir þú "medium rare", léttsteikt og meyr undir tönn. Léttsteiktar dramadrottningar eru ávallt gerðar úr besta hráefni. Þær eru lífrænt ræktaðar og því í raun móðgun að líkja þeim við hamborgara. Nær væri að framreiða þær sem steikur með góðri rjómasósu og bökuðum kartöflum.



Léttsteiktar dramadrottningar skammast sín ekki fyrir að vera dramadrottningar. Þvert á móti eru þær stoltar af því og leggja rækt við þann hluta persónuleika síns. Gott jafnvægi ríkir á milli drama og yfirvegunar. Í raun hefur léttsteikta dramadrottningin fulla stjórn á dramatíska hluta heilans. Hún er því fær um að halda dramanu í skefjum þegar við á en gerir út á það þegar hún er í stuði til þess.



Léttsteiktar dramadrottningar eru tilfinningaríkar. Þær eru gjarnan leiðtogar í vinahópi sínum, eru vel liðnar af flestum, dáðar af mörgum en einnig öfundaðar af sumum. Hin léttsteikta drottning er hins vegar haldin jafnaðargeði og lætur hólið ekki stíga sér til höfuðs eða öfundsýki koma sér úr jafnvægi.


Hversu mikil dramadrottning ert þú?

Leikhús

Í gær brá ég mér í leikhús með krónprinsinum og skólafélögum hans. Við sáum Skilaboðaskjóðuna í Þjóðleikhúsinu og er skemmst frá því að segja að þetta er alls ekki leikrit fyrir fullorðna. Börnin höfðu flest nokkuð gaman af en foreldrarnir dottuðu yfir sýningunni nema þegar Þórunn Lárusdóttir og/eða Árni BeinteinnÁrnason voru á sviðinu (sem var allt of sjaldan). Af einhverjum ástæðum voru tveir leikarar fjarverandi og afleysingafólk kom í þeirra stað, Katla Margrét Þorgeirsdóttir er fín leikkona en Baldur Trausti Hreinsson hefði alveg eins getað sleppt því að mæta, hann lagði ekkert til. Reyndar voru uppi getgátur um þynnku eða veikindi (hans sko... ekki samt Hans) en ég veit ekkert hvort það var eitthvað til í því.
Sjónrænt er þessi sýning listaverk, búningar og sviðsmynd algjörlega gullfalleg en það dugar því miður ekki til.

Helvítis hroki í manni alltaf hreint.

Best í heimi

Trall og tjútt í Borg Sársaukans

Við hjónin fórum í bráðskemmtilegt hlaupársafmæli í gær og lögðumst svo í mannlífsrannsóknir á Ölstofunni ásamt afmælisbarninu. Þar hitti ég gamlan vinnufélaga sem í eina tíð var efnismaður en hangir nú á börum og betlar sígarettur. Synd.

Veit einhver hvar ég fæ góðan lögfræðing? Ég ætla í mál við erkifíflið sem ákvað að það væri góð hugmynd að setja niður járnbólur í götur borgarinnar. Ég er hölt á báðum eftir að hafa snúið mig á ökkla og hoggið sundur annað hnéð svo sá inn að beini. Allt helvítis járnbólunum að kenna.

Borg Sársaukans á ekki upp á pallborðið hjá mér í dag, læt ekki sjá mig þar næstu mánuðina (að undanskilinni lítilli leikhúsferð á morgun) svo ef þið eigið við mig erindi þá megiði gjöra svo vel að gera ykkur ferð í Þorp Satans.

Týndi hlekkurinn

Einhverra hluta vegna hefur slatti hlekkja horfið við umskiptin. Endilega látið vita ef ykkur vantar á listann.

Ljóð

Er ekki
við hæfi að hefja
nýtt
líf á ástaróði.

Nýjir tímar

Nú ætla ég að umfaðma mína innri væmni, hún hefur hvort eð er verið einráð á blogginu síðasta ár.

Júróvisjonúrslit

Ekki minn tebolli.

Laugardagsmorgunn á landsbyggðinni

Það er gott að búa í Þorpinu. Tvö börn bönkuðu upp á hjá mér rétt í þessu til að selja mér nýbakaðar kleinur. Beat this Kópavogur!

Af tíðarfari og öðru fari

Ég nenni náttúrulega ekkert að skrifa um veðrið enda nægir aðrir sem sjá um það, ég ætla að víkja aðeins að öðru fari. Heilsufarið á heimilinu hefur ekki verið upp á marga fiska að undanförnu og hefur allt heimilisfólk fengið að kenna á því. Við hjónin mættum í vinnu hvort sinn daginn í vikunni en lágum þess á milli í bælinu, kvað svo rammt að heilsuleysinu að einn daginn reis ekkert okkar fjögurra úr rekkju. Karlpeningurinn er óðum að koma til en undirrituð er enn óttalega lasburða og sjálfsvorkunin í hámarki.

Það er annars helst að frétta að ég fór í langþráða leiser aðgerð í janúar og er nú að læra í fyrsta skipti að nota bæði augun í einu, það gengur hægt en örugglega. Mesta breytingin er sú að geta lesið götuskilti í meira en þriggja metra fjarlægð, nýtt líf alveg.

Ég er byrjuð að vinna hálfan daginn á Byggðasafni Ölfuss og verð þar eins lengi og fjárlög og verkefni leyfa. Skemmtileg vinna sem hentar mér fullkomlega.

Leikfélagið vann frækinn sigur á þorrablóti heimamanna um síðustu helgi og mun halda uppteknum hætti í barnaleikriti sem verður frumsýnt með vorinu. Gaman að þessu.

Fréttum er lokið.
Veriði sæl.

Grín aldarinnar!!!

Teprur dauðans. Í orðsins fyllstu.

Brotin loforð...

Ekki er hægt að segja að ég hafi staðið við loforðið um vikulegt blogg en hver veit hvað þorrinn ber í skauti sér.

Fyrir rúmum tveimur vikum lagðist ég undir geislann og lét laga meðfædda fötlun að eins miklu leyti og hægt er, sjónin er smám saman að lagast en er samt soldið skrítin enn.

Æfingar eru hafnar á barnaleikriti sem til stendur að frumsýna í apríl og eins er undirbúningur fyrir þorrablót bæjarbúa kominn á fullt.

Í næstu viku byrja ég svo aftur í byggðasafni Þorpsins og verð þar alla morgna eitthvað fram eftir vori a.m.k.

Þetta er líf mitt í hnotskurn um þessar mundir.

Sæl að sinni.

That's one small step for a man; one giant leap for mankind

Emil tók fyrstu skrefin rétt í þessu.

Til hamingju með afmælið Emil Hrafn!

laugardagur, janúar 06, 2007

Klukkan 13:15 fæddist drengur með rauðleitt hár, hann er 51 cm og 3740 gr og hefur hlotið nafnið Emil. Þetta gekk ljómandi vel en ég skal segja ykkur betur frá síðar, nú má ég til með að leggja mig þar sem ég hef ekki sofið í rúman sólarhring.

Sjáumst.

Svei mér ef ég blogga ekki bara smá

Gleðilegt ár gott fólk! Takk fyrir allt gamalt.

Hér var rokna partý í gær og allir í góðum gír, fórum ekki að sofa fyrr en undir morgunn, úttroðin af mat og drukk. Og btw þá var skaupið gott.

2007 var að mestu gott ár en að sjálfsögðu stendur 6. janúar uppúr. Emil Hrafn er að verða eins árs og er dásamlegt barn eins og stóri bróðir, við hjónin erum lukkunnar pamfílar.

2008 verður gott ár, ég finn það í beinunum. Ég verð rík og fræg og tek mig gasalega vel út í bikiníi í sumar. Ég fer samt ekki í vax á árinu. Ég massa nokkuð sem hefur lengi bankað í bakið á mér. Gæti gildnað um mig miðja á síðari hluta árs en það verður vonandi ekki af súkkulaðiáti. Ég blogga a.m.k. einu sinni í viku.
Í þessari spá ræður óskhyggja ríkjum.

Þar til næst.

Gleðileg jól!

Af bloggþreytu og öðru ef ég mögulega nenni.

Þeir sem enn nenna að lesa þessa síðu (ef einhverjir eru) hafa kannski tekið eftir mikilli bloggdeyfð síðan ég flutti aftur heim. Ég hef hreinlega ekki eirð í mér til að skrifa nokkurn skapaðan hlut, er með einhvern athyglisbrest núna. Ég á í vandræðum með að lesa heila bók. Ég er með skrilljón bækur á náttborðinu og er byrjuð á þeim öllum, á bara voða erfitt með að halda mig við eina. Sunnudagskrossgáturnar fara auðar út í grænu tunnuna og blöðin fara sömu leið, ólesin. Það er eitthvað að mér.

Nú gefur þvottavélin til kynna að hún sé hætt að þvo svo mér er óhætt að henda í þurrkarann og fara í bælið.

Komin heim

...fyrir nokkrum dögum, hef tekið síðustu daga í að ganga frá góssinu sem tróð sér í töskurnar mínar. Strákarnir mínir eru búnir að vera hálf slappir og keppast um athygli mína, bíllinn minn er sárlasinn en ég nenni ekki að sinna honum, neita bara að fara út úr húsi .

Ferðin var allt sem ég óskaði mér, ég hitti tvær yndislegar í Northampton en hefði gjarnan viljað hitta fleiri skvísur og komast á fleiri trúnó, það bíður betri tíma. Ferðafélagarnir voru æðislegir, ótrúlegt hvað maður kynnist sínum nánustu á nýjan hátt í öðru umhverfi.

Nú er jólaskapið farið að knýja dyra og ég sit hér sötrandi jólatúborg og japlandi harðfisk.
Yfir og út.

Kveðja

Í fyrramálið höldum við Emil á vit ævintýranna. Þjófar geta sleppt því að gera sér ferð heim til mín þar sem helmingur heimilismanna verður á staðnum.

Sjáumst eftir nokkra daga.

p.s. Magnþóra, ég vona að þú sért að skemmta þér vel.

Elsku pabbi

Til hamingju með afmælið!

Víðförull garðdvergur

Northamptonbúar taka upp á ýmsu sér til dundurs. Hver man ekki eftir öryggisverðinum sem reyndi að kaupa þjónustu leigumorðingja til að koma eiginkonunni fyrir kattarnef?

Í september hvarf garðdvergur af bar þar sem hann starfaði sem lukkudýr, skömmu síðar fóru að berast póstkort og myndir af kvikindinu í Grikklandi þar sem hann skoðaði merka staði, smakkaði raki, feta ost og vingaðist við innfædda. Hann er nú kominn til baka á sinn stað og fræðir bjórþyrsta Englendinga um ævintýri sín og kollega síns sem hann kynntist á ferðalaginu, asna frá Warwickskíri.

Ég elska Breta.

Martröð

Ég hlakka afskaplega mikið til væntanlegrar utanlandsfarar en eitthvað er undirmeðvitundin að gera gys að mér. Mig dreymdi að ég horfði á þotu Icelandair hrapa á blokk og allir farþegarnir fórust. Ég var líka að pakka niður til fararinnar og var að sjálfsögðu á síðasta snúningi með allt, öll fötin okkar Emils voru óhrein og ég hafði ekki hugmynd um hvað best væri að hafa með. Ég gleymdi enska símakortinu mínu og gat þess vegna ekki hringt í neina vini í Englandi. Við komust aldrei til Bicester og allar lestarsamgöngur lágu niðri. Ég missti af fluginu heim og týndi Emil.

Er ekki fall faraheill?
Eins gott að við fljúgum ekki með Icelandair.

Sætilíus

Sonur föður síns

Framtíðarsýn

Eftir viku verð ég á rölti um Bicester, spreðandi peningum hægri og vinstri. Gefull hlakka ég til.

Vopn og draumfarir

Af hverju í andskotanum sækist illþýðið í að halda ráðstefnur á Íslandi? Næst verða það eiturlyfjabarónar sem tilkynna komu sína. Heimur versnandi fer.

Mig dreymir stundum að ég sé í Englandi. Stundum er ég að ferðast um landið í lestum og stundum er eyði ég tímanum í verslunum. Í nótt var ég rekin út úr stærstu verslunarmiðstöð landsins fyrir ókurteisi. Vonandi er ég ekki mjög berdreymin því leið mín liggur einmitt þangað eftir tvær vikur eða svo. Merkilegt samt með þessa drauma, yfirleitt er dreymir mig ekki raunverulegt umhverfi heldur eitthvað sem ég hef aldrei séð og iðulega birtist þetta draumalandslag mér aftur og aftur, ég er farin að rata ágætlega.

Nýjasta dótið...

er Canon EOS 350 D. Ég kann að sjálfsögðu ekkert á hana en ætla bara að fikta mig áfram og sjá hvort ég geti ekki tekið myndir af börnunum skammlaust. Nú er ég búin að mynda allt innanhúss og langar út að leika mér en það er bara þetta endalausa skítaveður sem gengur hér yfir. Yfirleitt er haustið yndislegur tími en nú er mér bara illt í sálinni. Skammdegisþunglyndi hvað.

Eru konur leikföng?

Yngsti maðurinn á heimilinu kveikti á sjónvarpinu og það vill svo til að skjár einn er að sýna tónlistarmyndbönd. Þegar ég var krakki mátti ég alls ekki missa af skonrokki eða hinum þáttunum öllum og langskemmtilegust voru myndböndin sem sögðu einhverja sögu eða gáfu nýja sýn á tónlistina. Það er enn skoðun mín. Iðnaðinum hefur farið mikið aftur og gerir sitt besta til að draga úr jafnrétti kynjanna, hálfnakið kvenfólk í tugatali falbýður sig mishuggulegum karlmönnum og virðist ekki þurfa að hafa neitt annað til brunns að bera en sexapíl. Er ekki kominn tími til að stöðva þetta? Er það forsvaranlegt að börnin okkar sjái þennan viðbjóð í sjónvarpinu um hábjartan dag?

Hann tók þessar líka

Steini bróðir tók þessar

Friðarsúludagurinn mikli

er runninn upp en þar sem bróðurpartur heimilisfólks situr á salerninu verður einungis kveikt á kerti á baðherberginu. Friðarsúlutendrun mín bíður betri tíma. Ykkur sem ætluðuð að koma bendi ég á að skreppa út á Geldinganes eða í heimsókn til Steina bró, hann ætti að sjá súluna hennar Yoko ágætlega.

Góðar stundir.

Vinkona hans Steina

ætlar að reisa einhvern staur í Viðey í næstu viku og Íslenska ríkið borgar brúsann. Skattgreiðendur eru ekki á eitt sáttir hvort þar sé almannafé vel varið en ég sé ekki hvað við höfum betra við peningana að gera en að steypa stólpa á eyjum landsins.

Ég hef ákveðið að reisa mína eigin friðarstöng í garðinum hjá mér. Mun sú athöfn fara fram á sama tíma og frú Ono sviptir hulu af sinni. Í boði verða léttar veitingar, alveg fisléttar. Kranavatn og mjólkurkex. Allir þeir sem ekki fengu boðskort í bruðlið eru velkomnir.

Six pack

Ég, eins og svo margar aðrar konur, á í mestu vandræðum með að losna við aukakílóin sem hafa klesst sér utan á mig undanfarna 18 mánuði. Ekki er eingöngu hægt að kenna meðgöngu um því súkkulaði klístrar sér utan á maga, rass, læri og brjóst án þess að ég fái nokkuð við ráðið. Í sumar reyndi ég ræktina en það gekk bara ekkert of vel. Nú er það rope yoga. Fyrsti tíminn var í morgun og ég var næstum því vonsvikin þegar ég fór út, svitnaði ekkert og fann ekkert fyrir þessu nema þá helst í rófubeininu. Ég er búin að eyða deginum í að hugsa hvort ég eigi eitthvað að vera að púkka upp á þetta. Sem ég sit hér og horfi á Næturvaktina á youtube.com fer mig skyndilega að verkja í magann þegar ég hlæ. Ég er með strengi. Best að gefa þessu séns.

Fyrir Steina

Heiðursmennirnir

Aðalsteinn og Guðmundur fá innilegar hamingjuóskir í tilefni dagsins. Þeir mega jafnvel velja óskalag ef þeir rekast hér inn.

Jæja

Af síðustu bloggfærslum má ráða að ég sé 14 ára gelgja. Það er ekki rétt. Ég er 33 ára gelgja.

Og meira

Afmælið var reyndar mjög skemmtilegt líka. Eiginlega aðeins of.

Pínu starstruck sko

Það er fáránlegt að vera á tónleikum með uppáhalds heimsfrægu hljómsveitinni sinni á minni stað en Ráðhúskaffi í Þorlákshöfn. Það er fáránlegt að standa 5 metrum frá uppáhalds heimsfrægu hljómsveitinni. Það er fáránlegt að eiga DNA úr uppáhalds heimsfræga söngvaranum.

Fáránlegt en samt allt saman satt.

Skemmtilegt kvöld framundan

Afmælisveisla hjá stóra bróður og Franz Ferdinand. Gerist ekki betra.

Morð að yfirlögðu ráði

Ég drap geitung og ég sé ekkert eftir því.

Þvílík ömurð

sem þetta veður er. Ég hafði hálfgert samviskubit yfir því að senda snillinginn út í morgun.

Annars var síðasta helgi snilld, nemöndin gerði sér ferð yfir fjöll og firnindi og fór með mér á bráðskemmtilega tónleika þeirra Hvanndalsbræðra, miklir eðalmenn þar á ferð og voða notalegt að heyra norðlenskuna svona fjarri æskuslóðunum.

Tilhlökkunin fyrir næstu tónleika magnast stöðugt, ég hangi yfir youtube.com og skoða ný og gömul myndbönd FF, gefull hlakka ég til.

Stanslaust stuð

Lífið tók óvænta stefnu í dag og ég á núna miða á Franz Ferdinand næsta laugardagskvöld.

Allt í einu

langaði mig til að blogga. Ég hef að vísu ekkert að segja, allt með kyrrum kjörum hér svo sem.
Í næstu viku held ég áfram að skrá og merkja muni byggðasafnsins í Þorpinu, mjög skemmtileg vinna.

Leibbalingurinn er byrjaður í skólanum og það lítur ágætlega út, hans uppáhalds fög eru dans og enska.

Emil er kominn með þriðju tönnina, farinn að skríða og setjast upp sjálfur, algjört met.

þetta er mér ofviða, meira seinna.

Fallegu synir mínir í vor

ískyggilegar tölur

Í júlí í fyrra bjuggu um 1800 mann í sveitarfélaginu mínu.
Um 700 górillur eru eftir á lífi í heiminum.

Versló.

Merkilegt hvað það grípur mig alltaf einhver útileguhugur þegar líður að verslunarmannahelgi, m.a.s. þótt þetta sé eina helgi sumarsins sem spáð er skítaveðri. Ég stenst að sjálfsögðu freistinguna og held mig heima, búin að byrgja mig upp af mat og drukk. Eins gott að það verði gott veður á pöllum Þorpsins.

Passið ykkur á bílunum.

Dularfulli þvotturinn

Ég veit ekki hvaðan allt þetta óhreina tau kom, einn daginn var þvottakarfan tóm en þann næsta rúmaði hún ekki nema 1/5 af tauinu. Það eru augljóslega einhver gremlins áhrif í gangi í þvottahúsinu mínu. Ég hamast við að þvo og þrífa því fyrr þori ég ekki að byrja á nýju Harry Potter bókinni, hún bættist í ólesna bókaflokkinn í dag. Ég tími eiginlega ekki að byrja á henni því þá þarf ég að klára hana.

Auðvitað

gleymdi ég að segja fréttir af þeim stysta sem er nú kominn með eina og hálfa tönn, borðar allt sem að honum er rétt, rúllar út um öll gólf, situr sjálfur og segir mamma og baba. Hann er svo mikill diplómat að hann ákvað að gera ekki of mikið upp á milli foreldra sinna. Annað hvort það eða þá að ströng þjálfun föðurins virkaði (hún fór þannig fram að þá sjáldan sem hann var heima, sat hann með Emil í fanginu og endurtók í sífellu orðið pabbi). Eiginmaðurinn trúði ekki að drengurinn hefði sagt mamma fyrr en nokkrum klukkustundum síðar þegar sá stutti ákallaði okkur bæði.

Fréttir?

Í júlí vann ég verkefni fyrir byggðarsafn Þorpsins (sem í raun er bara til í kössum og kirnum), fékk góða gesti frá Englandi, tók túristann á þetta, fékk ofurflott grill í afmælisgjöf, þyngdist ég um skrilljón kíló.
Í öðrum fréttum er það helst að athyglisspanið er nákvæmlega ekki neitt og stafsetning er eitthvað sem ég skil ekki og kann ekki. Ekki biðja mig að muna neitt.

Árans klukk hvetur konu til að blogga.

Magnþóra fer fram á að ég birti átta staðreyndir um sjálfa mig.

1. Ég geng með orkusteina á mér

2. það skemmtilegasta sem ég geri er að lesa

2.a) ég á 18 ólesnar bækur uppi í hillu

2.b) það hefur aldrei gerst áður

2.c) mér finnst skemmtilegast að lesa vísindaskáldsögur og hrylling

3. Ég elskaði að búa í Englandi

4. Ég leyfi eiginmanninum aldrei að grilla

5. Í dag skoðaði ég blogg annarra í fyrsta skipti í margar vikur

6. Brjóstagjöfin olli hjá mér alvarlegum athyglisbresti

7. Ég elska Crocks skóna mína

8. Mig dreymir baráttu um heimsyfirráð að meðaltali einu sinni í viku

Meira blogg um veður (nöldur?)

Ég settist í sólbað á pallinum mínum en þá kom þrumuveður og batt enda á góðviðriskaflann. Týpískt.

Blogg um veður

Norðurland var indælt en veðrið ekkert spes fyrr en daginn sem ég yfirgaf það. Týpískt.

Sumarfrí?

Gámurinn kom á fimmtudag, ég nennti ekki að taka upp úr kössum og skellti mér til Akureyrar með börnin mín. Verð hér fram á föstudag. Bless þangað til.

Til hamingju með daginn systur!

Ég á...

afmæli í dag
ég á afmæli í dag
ég á afmæli sjaaááállf
ég á afmæli í dag!

Rugluð Rás 2?

Það hefur aldrei verið launungarmál að Rás 2 er uppáhalds útvarpsstöðin mín og spjallþættir og fréttatengt efni er oftast býsna málefnalegt og gott. Það gerðist samt eitthvað nú rétt í þessu þegar ég var að hlusta á einhvern síðdegisþátt, það eru pappakassar við stjórnvölinn. Einum umsjónarmanni þáttarins fannst þetta blogg svo fyndið að hann mátti til með að lesa það í útvarpið og mæra óhóflega. Þetta er svo sem ekki í fyrsta skipti sem ég heyri þessu líkt við mansal en mér finnst þetta bara svo einstaklega ófyndið að ég verð bara foj. Húmorsleysi og allt það en ég ræð bara ekki við þetta, mér finnst þrælasala bara nákvæmlega ekkert til að gera grín að. Höfundur bloggsins fer svo sem ekkert leynt með þá staðreynd að hann er kjáni en stjórnendur þáttarins eiga að vita betur. Fávitar.

Tíminn líður hratt...

Snillingurinn minn er orðinn átta ára!

Til hamingju snúður!

Efni draumanna segiði...

Margar nætur í röð hefur mig dreymt að ég standi í baráttu við ill öfl sem ætla sér að ná heimsyfirráðum. Geimverur, nornir, vampýrur og pólitíkusar eru aðal andstæðingar mínir og allt illþýðið notar heilaþvott til að telja fólk á sitt band. Oftast get ég flogið en aldrei mjög hátt. Alltaf er ég í ókunnu landi.

Það þarf svo sem engan sérfræðing til að segja mér að flutningar hafi þarna eitthvað að segja og ímyndunaraflið þarf ekki að vera mjög sterkt til að sjá að ég er ekki fullkomlega sátt. Ég bíð bara eftir að fá dótið mitt og geta farið að búa okkur aftur heimili, ég er í limbói núna og ég kann ekki við það. Þetta væri skömminni skárra ef veðrið væri skaplegt en því er ekki að heilsa þessa dagana.

Annars er það helst að frétta að ég keypti mér líkamsræktarkort í dag og réði einkaþjálfara til að koma mér af stað, ég kunni ekki við konuna sem ég sá bregða fyrir í spegli á laugardag, í hjarta mínu er ég tvítug mjóna.

Heimsyfirráð eða dauði

Ég segi draumfarir mínar ekki sléttar.

Stanslaus veisla

Var að enda við að innbyrða ristað brauð, rækjur og hvítvín, afganga frá veislu sem við héldum ensku vinum okkar á föstudagskvöld. Mikið óskaplega var það gaman, síðustu gestirnir fóru ekki fyrr en í dag en það voru nú reyndar Íslendingar.

Síðasta vika hefur aðallega farið í búðarráp og eitthvað hefur kössunum fjölgað í kjölfarið en það er í góðu lagi, nú eiga synir mínir föt fyrir næsta árið en ég á svo sem aldrei nóg...

Nú er bara verið að henda niður í kassa og gera klárt fyrir gáminn sem kemur á þriðjudag, við ætlum að hverfa frá skítugu húsi og láta vana menn sjá um þrifin á meðan við slöppum af hér fyrir heimferðina. Ljúfa líf.

Sí jú on ðe kleik.

Litlir kassar...

eða stórir, þeir verða allir notaðir. Við erum sumsé byrjuð að pakka en tökum því rólega þar sem við þurfum nú að nota heilmikið af dóti næstu vikuna. Leifur er að hefja síðustu vikuna í skólanum og er bara ekkert allt of ánægður með það. Í gær fór hann og keypti litla gjöf handa uppáhalds kennaranum sínum og ætlar að færa starfsfólki skólans Nóa konfekt að skilnaði. Var ég búin að segja frá því að við fáum góða gesti svona síðustu dagana? Fögur snót og sonur hennar ákváðu að færa okkur konfektið heim að dyrum og ætla að stytta okkur stundir frá mánudegi til sunnudags. Eins og áður hefur komið fram þá rokka skyndiákvarðanir.

Og síðan ekki söguna meir...

Ég er sátt við sigurlagið en hefði viljað sjá Finna, Ungverja og Georgíumenn ofar. Terry er í sjokki yfir að Bretar hafi ekki fengið fleiri stig og kennir klíkuskap um. Klöguskjóða.

Krissi

Ég elska það að Finnarnir hafi hleypt sinni eigin útgáfu af Sylvíu Nótt í græna herbergið. Fokkings Terry Wogan er að drepast yfir henni. Reyndar er hann svo ógeðslega hrokafullur í garð Finnana að það er hrikalegt á að hlýða.

Júróvision

Þetta er líklega jafnasta og besta keppni sem ég hef lengi séð, fullt af lögum sem ég tel vel að sigri komin. En mikið óskaplega er Terry Wogan leiðinlegur kynnir.

Drífið ykkur á kjörstað ef þið eigið það eftir.

Þetta er ekkert nýtt

Tvíburar:
Þú ert aðal gellan eða gæjinn í dag. Öllum finnst þú hafa réttu svörin - og það er rétt. Bara ef þú gætir klónað þig og sinnt öllum. Svo má líka bara segja nei.

Mikið agalega...

eru þessir dansarar í júró þreyttir. Rekum þá fyrir næstu keppni. Annars eru nokkur bara þokkalega góð lög í boði, Serbía, Ungverjaland og Belgía standa upp úr só far.

Þreyta

Ég hef enga orku þar sem Emil Hrafn er búinn með járnbirgðirnar mínar í bili. Er nú á kúr og vonast til að hjarna við fyrir Lundúnaferðina um næstu helgi. Kannski tek ég mér smá bloggfrí á meðan ég er að koma til enda er ekkert að gerast, við erum enn á heimleið, búin að bóka flug í lok þessa mánaðar og erum að byrja að pakka.

Sí jú leitör allígeitör.